Sir 39

1 [ϥ]ⲛⲁϣⲓⲛⲉ ⲛⲥⲁ ⲧⲥⲟⲫⲓⲁ ⲛⲛⲓⲁⲣⲭⲁⲓⲟⲥ ⲧⲏⲣⲟⲩ ⲁⲩⲱ ⲛϥⲧⲙⲥⲣϥⲉ ϩⲛ ⲛⲉⲩⲡⲣⲟⲫⲏⲧⲓⲁ 2 ϥⲛⲁⲁⲣⲉϩ ⲉⲡϣⲟϫⲛⲉ ⲛⲛⲓⲣⲙⲛⲥⲟⲉⲓⲧ ⲁⲩⲱ ϥⲛⲁⲃⲱⲕ ⲉϩⲟⲩⲛ ⲛⲙⲙⲁⲩ ϩⲛ ϩⲉ(ⲛ)ⲕⲧⲟ ⲙⲡⲁⲣⲁⲃⲟⲗⲏ 3 ϥⲛⲁϣⲓⲛⲉ ⲛⲥⲁ ⲙⲡⲉⲑⲏⲡ ⲛⲙⲡⲁⲣϩⲟⲓⲙⲓⲁ ⲁⲩⲱ ϥⲛⲁⲃⲱⲕ ϩⲛ ⲛⲁⲓⲛⲓⲅⲙⲁ ⲛⲙⲡⲁⲣⲁⲃⲟⲗⲏ 4 ϥⲛⲁϣⲙϣⲉ ϩⲛ ⲧⲙⲏⲧⲉ ⲛⲛⲛⲟϭ ⲛϥⲟⲩⲱⲛϩ ⲉⲃⲟⲗ ϩⲛ ⲛⲓⲁⲛϫⲱϫ ϥⲛⲏⲩ ⲉⲃⲟⲗ ϩⲓⲧⲛ ⲡⲕⲁϩ ⲛϩⲛϩⲉⲑⲛⲟⲥ ⲛϣⲙⲙⲟ ⲛⲁⲅⲁⲑⲟⲛ ⲅⲁⲣ ⲙⲛ ⲙⲡⲉⲑⲟⲟⲩ ⲉⲧϩⲛ ⲛⲣⲱⲙⲉ ⲁϥϫⲟⲛⲧⲟⲩ 5 ϥⲛⲁϯⲡⲉϥϩⲏⲧ ⲛϣⲟⲣⲡ ⲉⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲟϥ ⲁⲩⲱ ⲛϥⲥⲟⲡⲥ ⲙⲡⲉⲙⲧⲟ ⲉⲃⲟⲗ ⲙⲡⲉⲧϫⲟⲥⲉ ϥⲛⲁⲟⲩⲱⲛ ⲛⲣⲱϥ ϩⲙ ⲡⲉϥϣⲗⲏⲗ ⲁⲩⲱ ϥⲛⲁⲥⲟⲡⲥ ϩⲁ ⲛⲉϥⲛⲟⲃⲉ 6 ⲉⲣϣⲁⲛⲡϫⲟⲉⲓⲥ ⲡⲛⲟϭ ⲟⲩⲱϣ ϥⲛⲁⲙⲁϩϥ ⲙⲡ︤ⲛ︦ⲁ︥ ⲙ[…] ⲁⲩⲱ ϥⲛⲁⲧⲁⲟⲩⲟ ⲉ[…… ⲛ]ⲧⲉϥⲥⲟⲫⲓⲁ ϥⲛⲁⲉⲝⲟⲙⲟⲗⲟⲅⲉⲓ ⲙⲡϫⲟⲉⲓⲥ ϩⲙ [ⲡϣⲗⲏⲗ] 7 ⲁⲩⲱ ⲛⲧⲟϥ ϥⲛⲁⲥⲟⲟⲩⲧⲛ ⲙⲡⲉϥϣ[ⲟ]ϫⲛⲉ ⲙⲛ ⲧⲉϥⲥⲃⲱ ϥⲛⲁⲙⲉⲕⲙⲟⲩⲕϥ ϩⲛ ⲛⲉϥⲡⲉⲑⲏⲡ 8 ⲛⲧⲟϥ ϥⲛⲁⲟⲩⲱⲛϩ ⲉⲃⲟⲗ ⲛⲧⲉⲥⲃⲱ ⲙⲡⲉϥⲧⲥⲁⲃⲟ ⲁⲩⲱ ϥⲛⲁϣⲟⲩϣⲟⲩ ⲙⲙⲟϥ ϩⲙ ⲡⲛⲟⲙⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ 9 ⲁⲩⲱ ⲟⲩⲛϩⲁϩ ⲛⲁⲥⲙⲟⲩ ⲉⲧⲉϥⲙⲛⲧⲣⲙⲛϩⲏⲧ ⲁⲩⲱ ⲛⲥⲛⲁϥⲱⲧⲉ ⲉⲃⲟⲗ ⲁⲛ ⲛϣⲁⲉⲛⲉϩ ⲡⲉϥⲣⲡⲙⲉⲉⲩⲉ ⲛⲁⲗⲟ ⲁⲛ ⲁⲩⲱ ⲡⲉϥⲣⲁⲛ ⲛⲁⲱⲛϩ ϣⲁ ϩⲛϫⲱⲙ ⲛϫⲱⲙ 10 ⲛϩⲉⲑⲛⲟⲥ ⲛⲁϫⲱ ⲛⲧⲉϥⲥⲟⲫⲓⲁ ⲁⲩⲱ ⲟⲩⲛⲟⲩⲥⲟⲟⲩϩⲥ ⲛⲁϫⲱ ⲙⲡⲉϥⲧⲁⲓⲟ 11 ⲉϥϣⲁⲛⲙⲟⲩⲛ ⲉⲃⲟⲗ ϥⲛⲁⲕⲱ ⲙⲡⲉϥⲣⲁⲛ ⲉϩⲟⲩⲉϣⲟ ⲁⲩⲱ ⲉϥϣⲁⲛⲙⲟⲩ ϥⲛⲁⲣϩⲱⲃ ⲛⲁϥ 12 ⲉⲧⲓ ⲇⲉ ⲁⲓⲙⲉⲕⲙⲟⲩⲕⲧ ϯⲛⲁϣⲁϫⲉ ⲁⲩⲱ ⲁⲓⲙⲟⲩϩ ⲛⲑⲉ ⲙⲡⲟⲟϩ 13 ⲥⲱⲧⲙ ⲉⲣⲟⲓ ⲛⲁϣⲏⲣⲉ ⲉⲧⲟⲩⲁⲁⲃ ⲛⲧⲉⲧⲛϯⲟⲩⲱ ⲛⲑⲉ ⲛⲟⲩⲉⲣⲧ ⲉϥⲣⲏⲧ ϩⲓϫⲛ ⲟⲩⲙⲟⲟⲩ ⲉϥϫⲁⲓⲉ 14 ⲁⲩⲱ ⲛⲧⲉⲧⲛϯ ⲙⲡⲉⲧⲛⲥϯⲛⲟⲩϥⲉ ⲛⲑⲉ ⲛⲟⲩⲗⲓⲃⲁⲛⲟⲥ ⲛⲧⲉⲧⲛϯⲟⲩⲱ ⲛⲟⲩϩⲣⲏⲣⲉ ⲛⲑⲉ ⲛⲟⲩⲕⲣⲓⲛⲟⲛ ϯ ⲙⲡⲉⲧⲛⲥⲧⲟⲓ ⲛⲧⲉⲧⲛⲥⲙⲟⲩ ϩⲛ ⲟⲩⲥⲙⲟⲩ ⲥⲙⲟⲩ ⲉⲡϫⲟⲉⲓⲥ ⲉϫⲛ ⲛⲉϥϩⲃⲏⲩⲉ ⲧⲏⲣⲟⲩ 15 ϯⲟⲩⲙⲛⲧⲛⲟϭ ⲙⲡⲉϥⲣⲁⲛ ⲁⲩⲱ ⲛⲧⲉⲧⲛⲟⲩⲱⲛϩ ⲉⲃⲟⲗ ⲙⲡⲉϥⲥⲙⲟⲩ ϩⲛ ϩⲉⲛϩⲱⲇⲏ ⲛⲥⲡⲟⲧⲟⲩ ⲙⲛ ϩⲛϭⲓⲛⲩⲣⲁ ⲁⲩⲱ ⲛⲧⲉⲧⲛϫⲟⲟⲥ ⲛⲧⲉⲓϩⲉ ⲉⲧⲉⲧⲛⲟⲩⲱⲛϩ ⲉⲃⲟⲗ 16 ϫⲉ ⲛⲉϩⲃⲏⲩⲉ ⲧⲏⲣⲟⲩ ⲙⲡϫⲟⲉⲓⲥ ⲛⲁⲛⲟⲩⲟⲩ ⲉⲙⲁⲧⲉ ⲁⲩⲱ ⲟⲩⲉϩⲥⲁϩⲛⲉ ⲛⲓⲙ ⲛⲁϣⲱⲡⲉ ⲙⲡⲉϥⲟⲩⲟⲉⲓϣ 17 ⲛⲛⲉⲕⲉϣϫⲟⲟⲥ ϫⲉ ⲟⲩ ⲡⲉ ⲡⲁⲓ ⲁⲩⲱ ⲉⲩⲛⲁⲣⲟⲩ ⲙⲡⲁⲓ ⲥⲉⲛⲁϣⲓⲛⲉ ⲅⲁⲣ ⲛⲥⲱⲟⲩ ⲧⲏⲣⲟⲩ ϩⲙ ⲡⲉⲩⲟⲩⲟⲉⲓϣ ϩⲙ ⲡⲉϥϣⲁϫⲉ ⲁⲡⲙⲟⲟⲩ ⲁϩⲉⲣⲁⲧϥ ⲛⲑⲉ ⲛⲟⲩϫⲁⲧⲙⲉ ⲛϫⲛⲟⲟⲩ ⲁⲩⲱ ⲛⲛⲟⲩⲧ ⲙⲙⲟⲟⲩ ϩⲛ ⲛϣⲁϫⲉ ⲛⲣⲱϥ 18 ⲉⲣⲉⲡⲉϥⲟⲩⲱϣ ⲧⲏⲣϥ ϩⲙ ⲡⲉϥⲟⲩⲉϩⲥⲁϩⲛⲉ ⲁⲩⲱ ⲙⲛⲡⲉⲧⲛⲁϣϭⲱϫⲃ ϩⲙ ⲡⲉϥⲟⲩϫⲁⲓ 19 ⲛⲉϩⲃⲏⲩⲉ ⲛⲥⲁⲣⲝ ⲛⲓⲙ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲛⲛⲉⲩϩⲱⲡ ⲉⲛⲉϥⲃⲁⲗ 20 ⲁϥϭⲱϣⲧ ⲉϫⲱⲟⲩ ϫⲓⲛ ⲉⲛⲉϩ ⲛϣⲁ ⲉⲛⲉϩ ⲁⲩⲱ ⲙⲛⲗⲁⲁⲩ ⲛϣⲡⲏⲣⲉ ⲙⲡⲉϥⲙⲧⲟ ⲉⲃⲟⲗ 21 ⲛⲛⲉⲕⲉϣϫⲟⲟⲥ ϫⲉ ⲟⲩ ⲡⲉ ⲡⲁⲓ ⲁⲩⲱ ⲉⲩⲛⲁⲣⲟⲩ ⲙⲡⲁⲓ ⲛⲧⲁⲩⲥⲟⲛⲧⲟⲩ ⲅⲁⲣ ⲧⲏⲣⲟⲩ ⲉⲧⲉⲩⲭⲣⲓⲁ 22 ⲁⲡⲉϥⲥⲙⲟⲩ ⲙⲟⲩϩ ⲛⲑⲉ ⲙⲡⲉⲓⲉⲣⲟ ⲁⲩⲱ ⲁϥⲧⲥⲟ ⲙⲡⲕⲁϩ ⲛⲑⲉ ⲛⲟⲩⲕⲁⲧⲁⲕⲗⲩⲥⲙⲟⲥ 23 ⲧⲁⲓ ⲧⲉ ⲑⲉ ⲉⲧⲉⲣⲉⲧⲉϥⲟⲣⲅⲏ ⲛⲁⲕⲗⲏⲣⲟⲛⲟⲙⲓ ⲛϩⲉⲑⲛⲟⲥ ⲛⲓⲙ ⲛⲑⲉ ⲉⲛⲧⲁϥⲕⲧⲉϩⲉⲛⲙⲟⲟⲩ ⲉⲩⲙⲗϩ 24 ⲛⲉϥϩⲓⲟⲟⲩⲉ ⲥⲟⲩⲧⲱⲛ ⲛⲛⲉⲧⲟⲩⲁⲁⲃ ⲁⲩⲱ ⲥⲉⲟ ⲛϫⲣⲟⲡ ⲛⲛⲁⲛⲟⲙⲟⲥ 25 ⲛⲧⲁϥⲥⲛⲧⲛⲁⲅⲁⲑⲟⲛ ⲛⲛⲉⲧⲛⲁⲛⲟⲩⲟⲩ ϫⲓⲛ ⲛϣⲟⲣⲡ ⲁⲩⲱ ⲙⲡⲉⲑⲟⲟⲩ ⲛⲛⲣⲉϥⲣⲛⲟⲃⲉ 26 ⲧⲁⲣⲭⲏ ⲛⲭⲣⲓⲁ ⲛⲓⲙ ϩⲙ ⲡⲱⲛϩ ⲙⲡⲣⲱⲙⲉ ⲡⲉ ⲡⲙⲟⲟⲩ ⲙⲛ ⲡⲕⲱϩⲧ ⲙⲛ ⲡⲡⲉⲛⲓⲡⲉ ⲙⲛ ⲡⲉϩⲙⲟⲩ ⲁⲩⲱ ⲡⲥⲁⲙⲓⲧ ⲙⲡⲥⲟⲩⲟ ⲙⲛ ⲡⲉⲣⲱⲧⲉ ⲙⲛ ⲡⲉⲃⲓⲱ ⲁⲩⲱ ⲡⲉⲥⲛⲟϥ ⲙⲡⲉⲗⲟⲟⲗⲉ ⲙⲛ ⲡⲛⲉϩ ⲙⲛ ⲧⲉϣⲧⲏⲛ 27 ⲛⲁⲓ ⲧⲏⲣⲟⲩ ⲛⲧⲁⲩⲥⲟⲛⲧⲟⲩ ⲛⲛⲣⲙⲛⲛⲟⲩⲧⲉ ⲉϩⲛⲁⲅⲁⲑⲟⲛ ⲧⲁⲓ ⲧⲉ ⲑⲉ ⲉⲧⲟⲩⲛⲁⲕⲧⲟⲟⲩ ⲛⲛⲣⲉϥⲣⲛⲟⲃⲉ ⲉϩⲛⲡⲉⲑⲟⲟⲩ 28 ⲟⲩⲛϩⲛⲡ︤ⲛ︦ⲁ︥ ⲛⲧⲁⲩⲥⲟⲛⲧⲟⲩ ⲉϫⲓⲕⲃⲁ ⲁⲩⲱ ϩⲛ ⲡⲉⲩϭⲱⲛⲧ ⲁⲩⲧⲁϫⲣⲟ ⲛⲛⲉⲩⲙⲁⲥⲧⲓⲅⲝ ϩⲛ ⲡⲉⲟⲩⲟⲉⲓϣ ⲛⲑⲁⲏ ⲥⲉⲛⲁⲡⲱϩⲧ ⲛⲧⲉⲩϭⲟⲙ ⲁⲩⲱ ⲥⲉⲛⲁϯϩⲣⲟⲕ ⲙⲡϭⲱⲛⲧ ⲙⲡⲉⲛⲧⲁϥⲧⲁⲙⲓⲟⲟⲩ 29 ⲡⲕⲱϩⲧ ⲙⲛ ⲧⲉⲭⲁⲗⲁⲍⲁ ⲙⲛ ⲫⲉⲃⲱⲱⲛ ⲙⲛ ⲡⲙⲟⲩ ⲛⲁⲓ ⲧⲏⲣⲟⲩ ⲛⲧⲁⲩⲥⲟⲛⲧⲟⲩ ⲉϫⲓⲕⲃⲁ 30 ⲛⲛⲁϫϩⲉ ⲛⲛⲉⲑⲏⲣⲓⲟⲛ ⲙⲛ ⲛⲟⲩⲟⲟϩⲉ ⲙⲛ ⲛϩⲟϥ ⲁⲩⲱ ⲧⲥⲏϥⲉ ⲉⲧϫⲓⲕⲃⲁ ⲉⲡⲧⲁⲕⲟ ⲛⲛⲁⲥⲉⲃⲏⲥ 31 ⲥⲉⲛⲁⲉⲩⲫⲣⲁⲛⲉ ϩⲛ ⲧⲉϥⲉⲛⲧⲟⲗⲏ ⲁⲩⲱ ⲛⲥⲉⲥⲃⲧⲱⲧ ϩⲛ ⲛⲉϥϭⲓϫ ϩⲓϫⲙ ⲡⲕⲁϩ ⲛⲛⲉⲩⲡⲁⲣⲁⲃⲁ ⲛⲟⲩϣⲁϫⲉ ϩⲛ ⲟⲩⲟⲩⲟⲉⲓϣ 32 ⲉⲧⲃⲉ ⲡⲁⲓ ⲁⲓⲧⲁϫⲣⲟⲓ ϫⲓⲛ ⲛϣⲟⲣⲡ ⲁⲓⲙⲉⲕⲙⲟⲩⲕⲧ ⲁⲓⲕⲁⲁⲩ ϩⲛ ⲟⲩⲥϩⲁⲓ 33 ϫⲉ ⲛⲉϩⲃⲏⲩⲉ ⲧⲏⲣⲟⲩ ⲙⲡϫⲟⲉⲓⲥ ⲛⲁⲛⲟⲩⲟⲩ ⲁⲩⲱ ϥⲛⲁϯⲭⲣⲓⲁ ⲛⲓⲙ ϩⲛ ⲧⲉⲥⲟⲩⲛⲟⲩ 34 ⲙⲉⲕⲉϣϫⲟⲟⲥ ϫⲉ ⲡⲁⲓ ϩⲟⲟⲩ ⲉⲡⲁⲓ ⲛⲁⲛⲟⲩⲟⲩ ⲅⲁⲣ ⲧⲏⲣⲟⲩ ϩⲙ ⲡⲉⲩⲟⲩⲟⲉⲓϣ 35 ⲧⲉⲛⲟⲩ ϭⲉ ⲥⲙⲟⲩ ⲉⲣⲟϥ ϩⲙ ⲡⲉⲧⲛϩⲏⲧ ⲧⲏⲣϥ ⲙⲛ ⲧⲉⲧⲛⲧⲁⲡⲣⲟ ⲛⲧⲉⲧⲛⲥⲙⲟⲩ ⲉⲡⲣⲁⲛ ⲙⲡϫⲟⲉⲓⲥ